पूर्वाञ्चल क्यान्सर अस्पताल उद्घाटन गर्न प्रधानमन्त्री ओली झापा आउँदै


झापा : प्रधानमन्त्री केपी शर्मा ओली यसै साता दोस्रो पटक गृह जिल्ला झापा आउँदैछन्। बिर्तामोडमा दुर्गा प्रसाईँले एक वर्षअघि सञ्चालनमा ल्याएको पूर्वाञ्चल क्यान्सर अस्पतालको उद्घाटन गर्न ओली आज गृह जिल्ला झापा आउन लागेका हुन्। उनी गत आइतबार झापा आएका थिए।

उद्घाटन कार्यक्रममा प्रधानमन्त्री ओलीसँगै संस्कृति, पर्यटन तथा नागरिक उड्डयनमन्त्री भानुभक्त ढकाल, शिक्षामन्त्री गोपालमान श्रेष्ठ, शहरी विकास मन्त्री प्रभु साह, संविधान सभाका अध्यक्ष सुवासचन्द्र नेम्बाङ, पूर्वमन्त्री महेश बस्नेतसहित कलाकारहरू मदनकृष्ण श्रेष्ठ र हरिवंश आचार्य, मनीषा कोइराला, भारतीय अभिनेतृ सोनाली बान्द्रेलगायत आउने अस्पतालका कार्यकारी निर्देशक दुर्गा प्रसाईँले जानकारी दिए। प्रधानमन्त्री ओली बिहान ११ बजे काठमाडौंबाट यती एयरलाइन्सको विमानमा चन्द्रगढी विमानस्थल भद्रपुर आइपुग्ने कार्यक्रम रहेको छ।

प्रसाईँले २०७१ फागुनमा सञ्चालनमा ल्याएको बिएण्डसी अस्पतालको उद्घाटन तत्कालीन प्रधानमन्त्री पुष्पकमल दाहाल ‘प्रचण्ड’ले गरेका थिए। बिएण्डसी अस्पतालले २०७४ मंसिर २ मा आयोजना गरेको पूर्वाञ्चल स्वास्थ्य महोत्सवमा समारोहमा प्रधानमन्त्री ओली र नेकपाका अध्यक्ष प्रचण्डसँगै आएका थिए। उक्त समारोहमा ओली र प्रचण्डले बिएण्डसी अस्पताललाई मेडिकल कलेज सञ्चालन गर्न अनुमति दिने घोषणा गरेका थिए। तर, अहिलेसम्म मेडिकल कलेज सञ्चालनमा आउन सकेको छैन।

मेडिकल कलेज सञ्चालनको अनुमति नपाएपछि प्रसाईँले पूर्वका क्यान्सर पीडित बिरामीका लागि बिएण्डसी अस्पताल परिसरमै पूर्वाञ्चल क्यान्सर अस्पताल सञ्चालनमा ल्याएको हो ।

करिब छ सय करोड रुपैयाँको लागतमा निर्माण गरिएको क्यान्सर अस्पतालको क्षमता तीन सय शय्याको भए पनि हाल एक सय शय्या सञ्चालनमा रहेको जनाइएको छ । तीन सय शय्याको स्वीकृति पाएको सो अस्पतालमा क्यान्सर उपचारका लागि आवश्यक रेडियो थेरापी, केमो थेरापी, सर्जरीलगायत सम्पूर्ण सेवा उपलब्ध रहेको छ ।

गत वर्षदेखि नै उपचार सेवा सञ्चालनमा ल्याएको सो अस्पतालले एक वर्षका अवधिमा २६ हजारभन्दा बढीका बिरामीलाई ओपिडी सेवा प्रदान गरेको छ ।

अस्पतालमा पेट स्क्यान, एमआरआई, सिटी स्क्यानलगायत अत्याधुनिक उपकरण सञ्चालनमा रहेका अस्पतालका जनसम्पर्क अधिकृत प्रमिश गिरीले जानकारी दिए ।अमेरिका र जर्मनीमा बनेका ती उपकरणलाई हालसम्म नेपालका कुनै अस्पतालले सञ्चालनमा नल्याएको गिरीको दाबी छ । पूर्वका क्यान्सर रोगीहरूलाई मध्यनजर गर्दै सञ्चालनमा आएको अस्पतालमा छिमेकी मुलुक भारतबाट समेत बिरामीहरू आउने गरेको उनको भनाई छ ।


प्रतिक्रिया दिनुहोस !

सम्बन्धित खबरहरु

बुद्धशान्तिमा पिकअपको ठक्करबाट पैदल यात्रीको मृत्यु
प्रधानमन्त्रीको गृह नगरका सुकुम्बासीको टहरामा डोजर
प्रदेश १ प्रदेशसभा बैठक बस्दै, मुख्यमन्त्रीविरुद्धको अविश्वास प्रस्ताव फिर्ता हुने
सामुदायिक वनमा लागेको डढेलो वस्तीमा पुग्दा चार घर जल्यो