भारतबाट कुखुरा तथा मासुजन्य वस्तु आयातमा रोक


झापा । भारतबाट कुखुरा, दाना, अन्डा तथा मासुजन्य वस्तु आयात गर्न नपाइने भएको छ । भारतका विभिन्न ठाउँमा फैलिएको बर्ड फ्लु नेपाल भित्रिन नदिन सरकारले तत्कालका लागि आयातमा रोक लगाएको हो ।

कृषि तथा पशुपंक्षी विकास मन्त्रालय अन्तर्गतको पशुसेवा विभागले देशभरका आठवटा क्वरेण्टीन कार्यालयलाई पत्र पठाएर आयातमा रोक लगाउन निर्देशन दिएको छ । बर्ड फ्लु भित्रिन नदिन काँकडभिट्टा, विराटनगर, जनकपुर, वीरगञ्ज, काठमाण्डौ, भैरहवा, नेपालगञ्ज र गड्डाचौकीका पशु क्वरेण्टीन कार्यालयले जाँच गर्न थालिसकेको मन्त्रालयले जनाएको छ।

भारतको झारखण्ड, हिमाञ्चल, गुजरात, केरला, मध्यप्रदेश, राजस्थान, महाराष्ट्रलगायतका ठाउँमा बर्ड फ्लुको सङ्क्रमण फैलिएपछि नेपालमा पनि जोखिम बढेको भन्दै कडाइ गरिएको हो ।

मन्त्रालयले भारतबाट कुखुरा आयात गर्ने व्यवसायीलाई समेत उच्च सतर्कतामा रहन आग्रह गरेको छ । यस्तै देशभर कतै ठूलो परिमाणमा कुखुरा मरे वा शङ्कास्पद लक्षण देखिए तुरुन्त मन्त्रालय वा नजिकैको कार्यालयमा सम्पर्क गर्न पनि मन्त्रालयले किसानलाई आग्रह गरेको छ ।


प्रतिक्रिया दिनुहोस !

सम्बन्धित खबरहरु

नेपाली कृषिजन्य वस्तुको मूल्य भारतीयको हातमा
सेटिङ र पूर्वयोजना अनुसार झापामा कान्तिपुर ड्राइभिङ सेन्टरको मात्रै बोलपत्र दर्ता
मोरङमा शिक्षकको हत्या गर्ने विप्लव कार्यकर्ता पेस्तोलसहित पक्राउ
टिपरको ठक्करबाट झापामा किशोरीको मृत्यु